మలక్‌పేట రౌడీకో చిట్కా

ఈ చిట్కా ఆయనొక్కడికే కాదు అందరికీ. అందరి దృష్టినీ ఆకర్షించడానికి ఆయన పేరుని వాడుకుంటున్నా. ;)

మనం బ్లాగుల్లో లేదా ఇతరత్రా రాసేప్పుడు తరచూ ఇతరుల మాటల్ని ఉటంకించాల్సి ఉంటుంది—వాటిపై స్పందించడానికి కావచ్చు లేదా కేవలం ఉదహరించడానికే కావచ్చు. అయితే, ఆ మాటలు ఇతరులవి అని తెలిపేందుకు (అవి మన మాటలుగా పాఠకులు పొరపాటుగా భావించే అవకాశానికి తావివ్వకుండా ఉండేందుకు) కొన్ని పద్ధతులని అనుసరిస్తూ ఉంటాం: కొటేషన్ మార్కుల మధ్యలో పెట్టడం, లేదా వాలు అక్షరాలలో చూపించడం గట్రా. వాద-ప్రతివాదాలుగా లేదా వ్యాఖ్య-ప్రతివ్యాఖ్యలుగా ఉన్న టపాలని చదివేప్పుడు కొన్నిసార్లు ఎవరిది ఏ పాఠ్యమో తెలియక అయోమయంగా ఉంటుంది. మళ్ళీ కాస్త వెనక్కి వెళ్ళి చదువుకు రావాల్సి ఉంటుంది. ఈ చిట్కా అటువంటి అయోమయాన్ని నివారించడంలో తోడ్పడుతుంది.

ఇతరుల పాఠ్యాన్ని మన రచనల్లో, పత్రాలలో ఉటంకించే ఉపయోగార్థం HTMLలో blockquote అనే మూలకం ఉంది. మన టపాల్లో దీన్ని వాడుకోవడానికి బ్లాగర్ మరియు వర్డ్‌ప్రెస్‌లు రెండూ ఈ సౌలభ్యాన్ని మనకి అందిస్తున్నాయి. మనం ఉటంకించాల్సిన పాఠ్యాన్ని ఎంచుకుని, క్రింద తెరపట్లలో చూపించిన blockquote బొత్తాన్ని నొక్కడమే.

బ్లాగర్‌లో

వర్డ్‌ప్రెస్‌లో

ఒకవేళ నాలా మీరు నేరుగా HTMLలో వ్రాస్తూంటే, ఈ క్రింది విధంగా ఉపయోగించవచ్చు:

<blockquote>ఉటంకించిన పాఠ్యం</blockquote>

మీరు ఇతరుల బ్లాగుల్లో వ్యాఖ్యలు రాస్తున్నప్పుడు, వారి టపాలో ఒక ప్రత్యేక వాక్యాలకి వివరంగా స్పందిస్తుంటే, దాన్ని ఉదహరించడానికి పై సంజ్ఞావళిని వర్డ్‌ప్రెస్ బ్లాగుల్లో ఉపయోగించవచ్చు. అయితే, దీన్ని బ్లాగుస్పాట్ బ్లాగులు వ్యాఖ్యల్లో ఒప్పుకోవు.

మనం ఈ విధంగా ఉటంకించడం వల్ల, మన బ్లాగు అలంకారంలో పేర్కొన్న శైలికి అనుగుణంగా ఈ పాఠ్యం ప్రత్యేకంగా కనిపిస్తుంది. నేను ఈ blockquoteని ఉపయోగించిన టపాలు మచ్చుకి:

• ఈ ఆదివారం తెలుగు బాటకి రండి!
• హీబ్రూ నుండి స్ఫూర్తిని పొందుదాం!
• రోజువారీ సమాచార వినియోగంలో తెలుగు — నా ఆకాంక్షలు

ఈ చిట్కా మీ టపాలను సిరిమయం చేస్తుందని ఆశిస్తూ…

ఆనంద బ్లాగాయనం!