మీ టపాలో లంకె వేయడం ఎలా?

జాలంలో లంకెలనేవి ఆవశ్యకాలు. ఓ జాల పేజీకి మరే జాల పేజీల్లోనూ లంకె లేకపోతే ఆ పేజీ అనాధే. అసలీ లంకెల మీదే జాలం బతుకుతుంది. మీ టపాలో (లేదా పేజీలో) ఏదో విషయం ప్రస్తావించారనుకోండి, ఆ విషయానికి సంబంధించిన లంకెని కూడా ఇస్తే పాఠకులకు సౌకర్యంగా ఉంటుంది. లంకెలివ్వడంలో పోకడలు, లంకెలు ఎలా ఇవ్వాలో (ఇప్పటికే తెలియనివారికి) సూచనలు, గట్రాలు ఇవిగో.

ఇక బ్లాగుల్లో నేను గమనించిన ప్రకారం లంకెలివ్వడం మూడు రకాలుగా ఉంటుంది:

1. చిరునామాని యధావిధిగా టపాలో ఇవ్వడం (లంకె లేకుండా). పాఠకులు దాన్ని చూడాలంటే, కాపీ చేసుకుని ఆ లింకుని విహారిణిలో తెరిచి చూడాలి.
   • ఉదా.: మీ వర్డ్‌ప్రెస్ బ్లాగు టపాలలో లింకులెలా ఇవ్వాలో తెలుసుకోడానికి http://support.wordpress.com/links/ చూడండి.
2. చిరునామాని లింకుతోనే యధావిధాగా ఇవ్వడం. ఈ లంకె నొక్కదగినదైనా, చూడటానికి బాగోదు.
   • ఉదా.: తెలు-గోడు అబ్రకదబ్ర ఈ మధ్యే బ్లాగువార్షికోత్సవం జరుపుకున్నారు. http://anilroyal.wordpress.com/2009/05/07/%e0%b0%b8%e0%b0%bf%e0%b0%82%e0%b0%b9%e0%b0%be%e0%b0%b5%e0%b0%b2%e0%b1%8b%e0%b0%95%e0%b0%a8%e0%b0%82/
3. లంకె పాఠ్యం నొక్కదగినదిగా ఉండాలి. చిరునామా పైకి కనబడకూడదు.
   • ఉదా.: ఈ మధ్యే పర్ణశాల కూడా కొత్త సంవత్సరం జరుపుకుంది.

ఈ మూడింటిలోనూ, మూడవ పద్ధతి ఉత్తమం. లంకె అనేది మన వచనంతో కలిసిపోయి ఉంటుంది. చదవటానికి మధ్యలో ఆటంకం ఉండదు.

ఇక మీ మీ టపాల్లో లంకెలెలా ఇవ్వాలో చూద్దాం. ఈపాటికే ఈ సమాచారం జాలంలో ఉంది కాబట్టి, నేను కేవలం ఆ లంకెలిచ్చి చేతులు దులుపుకుంటాను.

• వర్డ్‌ప్రెస్ బ్లాగుల్లో లంకెలివ్వడం (వర్డ్‌ప్రెస్.కామ్ తోడ్పాటు సైటు నుండి).
• బ్లాగర్ (బ్లాగ్‌స్పాట్) బ్లాగుల్లో (బ్లాగర్ సహాయం నుండి)

టపాలు రాసేప్పుడు పై లంకెల్లో చూపించినట్టు లంకెవెయ్యడానికి బొత్తం ఉంటుంది. కానీ ఇతర బ్లాగుల్లో వ్యాఖ్యలు రాసేప్పుడు లంకె ఇవ్వాల్సివస్తే, కొంత HTML అవసరమవుతుంది. ఇదీ తేలికే. నమూనా కోడు ఇదీ:

<a href='లంకె చిరునామా'>లంకె పాఠ్యం</a>

పైన లంకె చిరునామా అన్న చోట మీరు లంకె వేయాలనుకుంటున్న టపా/పేజీ URL మరియు లంకె పాఠ్యం అన్న చోట, నొక్కడానికి కనబడాల్సిన పాఠ్యం ఇవ్వాలి. అది ఇలా కనిపిస్తుంది: లంకె పాఠ్యం.

ఆనంద జాలా లంఘనం!